کراچی کی انتظامیہ نے پاکستان تحریک انصاف اور جماعت اسلامی کی جانب سے کراچی میں نکالی گئی ریلی کی اجازت نہ لینے پر کارروائی کی سفارش کی ہے۔
کراچی کے کمشنر شعیب احمد صدیقی کے مطابق ریلی نکالنے کی اجازت نہیں دی گئی تھی، اس لیے ضابطہ اخلاق کی خلاف ورزی پر الیکشن کمیشن نوٹس لے گا۔
دوسری جانب ڈپٹی کمشنر شرقی اور ڈسرکٹ ریٹرننگ افسر ایسٹ آصف جان صدیقی نے ریلی کو بلدیاتی انتخابات کے ضابطہ اخلاق کی خلاف ورزی قرار دیتے ہوئے الیکشن کمیشن کو خط ارسال کیا ہے۔
ڈپٹی کمشنر شرقی آصف جان صدیقی کی طرف سے لکھے گئے خط میں کہا گیا ہے کہ عمران خان رکن قومی اسمبلی ہیں اور الیکشن کمیشن کے ضابطہ اخلاق کے تحت کوئی رکن قومی اسمبلی بلدیاتی انتخابات کی مہم نہیں چلاسکتا۔
خط میں سفارش کی گئی ہے کہ عمران خان کے خلاف الیکشن کمیشن کے قوانین کے تحت کارروائی کی جائے۔
خط میں جماعت اسلامی کے امیر سینٹر سراج الحق کا کوئی ذکر نہیں کیا گیا۔
دوسری طرف تحریک انصاف کے رہنما عمران اسماعیل نے کہا کہ ریلی کی اجازت کے لیے تحریری درخواست دی تھی۔
عمران اسماعیل کا دعویٰ تھا کہ کمشنر نے اجازت تونہیں دی تھی لیکن دھمکی دی تھی کہ اگر ریلی شہرمیں لائے تو مقدمات درج ہوں گے۔